الوضوح في العلاقات

بقلم :نورهان ابراهيم.

مأنت لو مهتم كنت عرفت لوحدك 

كم مرة لقيت اللي قدامك متغير معاك او اخد منك موقف وانت اصلا مش عارفة انت عملت اي!

كم مرة حصلت مشاكل علي حاجة تافهة نتيجة التراكمات؟

انا نورهان ابراهيم وانهاردة هكلمكم عن حاجة مهمة جدا وهي الوضوح في العلاقات.

في مصطلح حلو جدا اسمه ال Validation او التنفيس عن الروح بمعني ان اوقات تحس ان في حاجة خانقاك جامد وتعباك وفجأة بمجرد ما تحكي عن الحاجة دي تحس انك ارتحت بالرغم ان اللي قدامك ممكن يكون ماعملش حاجة غير انه سمعك.

بالظبط هو ده مفهوم ال Validation

مشكلة معظم الناس ان عندهم مشكلة في التعبير، بمعني ان انا لو زعلان من موقف معين بدل ما اروح اتكلم مع الشخص اللي عمل الموقف ده او احط في الاعتبار اني ممكن اكون فاهم غلط، لا ده انا بتجنب اني اتكلم معاه وبخاف من المواجهة واحاول ابين اني متدايق بإشارات بالنسبة للطرف التاني هي مبهمة!

كتير من العلاقات انتهت بسبب عدم الوضوح، وبسبب تفضيل الصمت عن المواجهة، وبالتالي النهاية المحتومة هي ظهور التراكمات.

فلما نسمع عن أسباب فشل علاقة معينة نحس انها أسباب تافهة او بسيطة، ولكن هي في الحقيقة ستارة لمشاكل تانية كانت أكبر داخل الشخص ده بس هو تجاهلها من غير ما يعبر عنها.

ده غير انك ممكن تبدأ ترسم خيالات وسناريوهات بينك وبين نفسك وتصيغ افتراضات مالهاش اي اساس من الصحة، وبمجرد ما تقعد تتكلم مع الشخص اللي كنت اخد منه موقف تكتشق ان الموضوع طلع أسهل مما تتخيل وان فعلا طاقة الغضب اللي جواك انطفت.

عشان كده عزيزي القارئ خليك دايما واضح وصريح مع اللي قدامك خصوصا في مشاعرك 😉